Ада-чуртче "фашист" шериг,
Араатанзыг халдап келчик.
Тайбың-дышты каржы үрээн–
Дайын өрдү өөскүп үнген.
Халап болган дайын дыңнааш,
Харыы сөстү баштай чарлааш:
Даглыг Тывам арат-чону
"Дадай"- дивейн холун сунду.
Эң-не дидим эрестиглер,
Эки-турачы ополченнер–
Шилиндектер аразындан,
Шиитпирлиг аъттаныпкан.
Кыпкан от дег чүректерниң
Кыйгызынга моондак турбаан.
Шылгалданың бергелерин,
Шыдап эрткеш соруун салбаан.
Эжен-түмен "нацистерниң"
Эжелепкен девискээрин:
Украина хоорай-суурун
Удаа-дараа хостап үндү.
Дайызынга дүжүп бербээн,
Дайынчылар аразында:
Өвүр черден өжээн негээн
Өңнүктер бар,ону утпа.
Дагба оглу Биче-оол Монгуш,
Даваа,Конгар–кезээ-тудуш.
Шылгараңгай дайынчылар–
Шынап сүрлүг Маадырлар.
Дубно дээштиң дүшкүүрлүг-ле
Тулчуушкунга балыглаткаш,
Хөрээн хос оък өде бээрге,
Көңгүс тооваан Биче-оол Монгуш.
Госпитальга чыттырарга,
Кончуг эриң ынаваан-даа.
Чалыы чүрек күштүг тевии–
Чаныш-сыныш билбези-дир.
Бүрзекейниң коргуш-ла чок
Бүзүрелдиг эзирлери,
Деражно,Сурмичиден
Дерзиилерни үндүр хөөглээн.
Бир-ле катап командири,
Биче-оолду келдирткештиң:
"Бо хүн даалгаң өскерилген,
Повар боор сен,күүсет!"-диген.
Соксаш дивес кидин чаада
Солдат өөрүн чемгерген-даа:
Изиг чеми үстүп-төнмээн,
Илдик чокка дажып-үлээн.
Ровно хоорай хосталырга,
Ровенщина оожургаарга:
Артып калган дайынчылар
Аалынче чаныпканнар.
Эрте дужаал келбээн болза,
Эчизинге,туюлунга–
Берлин чедир сокчур турган,
Берге орук шаптык болбаан.
Өңнүк-тала эжишкилер
Өршээлдиг бооп Өвүрүнче,
Эки-менди ээп келгеш,
Эгин кожа чурттап кааннар.
Эстип-читпес Маадырлар,
Экерлерниң аразында:
Чолдуг кудам–Дагба оглу,
Чоргааралым болуп чору.
Дайын уржуун көрүп эрткеш,
Тайбың-чаагай чуртталга дээш:
Шагдаалап-даа,малчыннап-даа,
Шалып-кежээ иженген-даа.
Амыдырал аас-кежиин
Ала-чайгаар шаңнаан ийин.
Ажы-төлдү бодараткан,
Алдар-атты чаалап алган.
Хеймер кызы акым-биле
Кежик-чолдуг бүле чүве.
Маадыр кудам холун туттум,
Мага хандыр куспакташтым.
Хөңнү биче кудамайның
Хөрээн каастаан орден-медаль:
Көрүжүмде чайынналды,
Көскү-хөрээм чырыш кынды.
Өвүр чарык Солчур суурда,
Өңнүктер ам тураскаалда.
Өндүрлерниң мөңге Ады
Өргүн чонда чурттап арты!
Аяс Санчай-оол.Улуг-Хем.Арыг-Үзүү.08.05.2019 чыл.
***МӨҢГЕ АДЫ ЧУРТТАП АРТЫ***
10 Май.
.jpg)
.jpg)
.png)
