2021 чылдың май 19-та Өвүр кожууннуң Монгуш Доржу аттыг төп ном саңынга Тыва Республиканың чогаалчылар Эвилелиниң даргазы Сайлыкмаа Салчаковна Комбунуң киржилгези-биле чечен чогаал каттыжыышкынының ажыдыышкыны болуп эрткен. Аңаа Хандагайты суурнуң шүлүк бижип чоруур чечен сөстүглери, тыва дыл, чогаал башкылары база ном саңының ажылдакчылары киришкен.
Сайлыкмаа Салчаковна тыва чогаалдың ниити байдалының дугайын өске чурттарның чогаал сайзыралы-биле деңнеп тургаш солун, ажыктыг медээлерни таныштырган.
Тыва чогаал, тыва дылды моон сонгаар сайзырадып, аныяк өскенге, келир үеде салгалдарга кадагалап арттырып бээри бо үениң эң-не чугула, чидиг айтырыы дээрзин айтып, чер чурттувуска чогаал ажылын сайзырадып, аныяк салым чаянныг бижикчилерни илередип, оларны деткиири-биле мындыг чогаал каттыжыышкыннарын тургузарының чугулазын шупту деткип, өөрүп хүлээп алдывыс.
Тываның шүлүкчүлериниң аразынга эртер хемчеглер планын, эгелеп чоруур бижикчилерге бодунуң номун үндүрүп аарынга хамаарыштыр дээш дыка эки, үнелиг арга сүмени, айтырыгларга чедимчелиг харыыларны киржикчилер дыңнап, хөйнү билип алганнар.
Монгуш Доржу аттыг төп ном саңынга 2019 чылдың январь 26-да "Шенелде бийир" деп аттыг чогаал бөлгүмү бо хүннүң киржикчилери шүлүкчүлерни хаара тудуп, ай санында планныг ажылдап эгелей берген турган. Бөлгүмнүң киржикчилери боттарының аразынга шүлүктерин таныштырып, мөөрей, ужуражылгалар дээш хемчеглерни эрттиргилээн.
Бо хүнгү ажыдыышкынның киржикчилери боттарының чогаал ажылынга киржилгезин, солун сактыышкыннарны, саналдарны кииргеннер. Чечен чогаал каттыжыышкынын "Улаатай" деп аттыг кылдыр шупту деткип, бир үн-биле бадылаан. Каттыжыышкынның даргазынга Анай-Хаак Лопсан-Серен, оралакчызыга Айлан Айдын-оол соңгутканнар.
Республикага ады-сураа чалгып чораан Өвүрнүң ат-сураглыг чогаалчыларының "Улаатай" аттыг чечен чогаал каттыжыышкыны 1981 чылда чогаалчы Николай Ооржактың удуртулгазы-биле тургустунган турган. Чон-биле быжыг харылзаалыг, ажыл-херээ солун, эптиг-демниг ол үениң "Улаатайжыларындан" Тываның ховар шүлүкчүлери, композиторлары оруун изеп, чонунга үнелиг чогаалдарын сөңнээннер. Ам оларның аразындан улуг өгбелеривис санныг кижи арткан. Бо хүн оларның оруун изеп, чылыг, чырык сактыышкыннар-биле "Улаатай" чечен чогаал каттыжыышкынын катап тургузуп турарынга шупту өөрүп, улуг үүле-херекти уштап-баштап, эгележип, чогаадыкчы чонну деткип келген даргавыс Сайлыкмаа Салчаковнага четтиргенивисти илереттивис.
Библиотека ажылдакчылары Сайлыкмаа Салчаковнаның сөңнээн үнелиг белээ-ховар номнарын өөрүп хүлээп ап, моон соңгаар чымыштыг ажыл-ижинге ак орукту хөй санныг номчукчуларывыстың өмүнээзинден күзеп арттывыс.
Монгуш Доржу аттыг төп ном саңының чурт шинчилел килдизиниң эргелекчизи Айлан Айдын-оол.
Өвүрде чечен чогаал каттыжыышкыны "Улаатай"
20 Май.
.jpg)
.jpg)
.png)
