Ниитизи-биле 24-76 назы-хар аразында Ак-Чыраа, Солчур, Саглы, Хандагайты сумуларының төлээлери киришкен.
Мөөрейниң ажыдыышкын кезээ В. Көк-оолдуң «Хайыраан бот» деп шиизинден Седип, Кара, Салбак, Уран оларның киржилгези-биле театржыткан көргүзүүнден эгелээн.
Мөөрей дараазында кезектерге болуп эрткен:
1. Таныштырылга.
2. Тыва аъш-чемни таныштырып сөңнээри.
3. В. Көк-оолдуң «Хайыраан бот» деп шиизинден Караның монологун чугаалап күүседири;
Эң узун болгаш эң чоон чашты илередири;
4. Уран-талант көргүзүү.
5. Кежээки хепке чажын эдип-чазап алганы база В. Ш. Көк-оолдуң чогаалдарындан киржикчи бүрүзүнге айтырыг-харыы.
Ховар, кайгамчык, чараш узун чаштыглар мөөрейниң негелдерин кижи бүрүзү бодунуу-биле тускай, тывынгыр кылдыр белеткенип алгаш көрүкчүлерни магадаткан. Ылаңгыя эң узун болгаш эң чоон чашты илередирде киржикчилерниң чаштарын сула салыпкан чыскаал көрүлдези база кежээки хепке чаштарын эдип-чазап алгаш чоргаар базып үнүп кээрге көрүкчүлер магадап, чарашсынып, чоргаарланып, диңмиттиг адыш часкаашкыннары-биле байырын чедирип уткуп алганнар.
Тыва херээжен кижиниң каас-чаражын, национал онзагай овур-хевирин, мөзү-бүдүжүн, уран талантызын аныяк өскенге таныштырып, суртаалдаар сорулгалыг эрттирген мөөрейни жюри кежигүннери түңнеп үндүргеннер:
Дээди шаңнал «Урук ышкаш узун чаъш – 2026» деп атка Эланна Норбу (Хандагайты),
1-ги черге «Эң узун чаъш – 2026» - Чинчи Сонам (Ак-Чыраа),
2-ги черге мөөрейниң хүндүлүг, үлегерлиг, узун назылыг Саглы сумузунуң төлээзи Оюмаа Саая,
«Эң-не чоон чаъш – 2026» - Ооржак Долчат (Саглы),
«Көрүкчүлерниң үнелели» - Айнаш Донгак (Хандагайты),
«Чараш, чаптанчыг Кара» - Сюзана Монгуш (Хандагайты) деп тускай аттарны тывыскан.
Тиилекчилерге дипломнар, тускай аттарның торгу ленталарын, акша шаңналдарын, номинацияларга дипломнар, өртектиг белектер болгаш акша шаңналдарын тывыскан.
Мөөрейни каастап, шаңнал-макталга үлүүн киириштирген
деткикчилеривис:
Чодураа Кечиловна Монгуш, Алдынай Дадаровна Хирбээ, район судунуң, кызыгаар камгалалының, кожууннуң төп эмнелгезиниң, суд приставтарының болгаш Өвүр кожуунда №10 Өрт кезээниң коллективтеринге өөрүп четтиргенивисти илереттивис.
Амгы үеде узун, чоон чаштыглар ховартаан-даа болза, өскелерге үлегерин көргүзүп, чоннуң хей аъдын көдүрүп, кыс кижиниң көргүзүкчүзү, им демдээ болур, ава чаяан узун чаштыгларның мөөрейи чоннуң сонуургалын оттуруп, бедик деңнелге эрткенин киржикчилер болгаш көрүкчүлер үнелеп, демдеглевишаан, четтиргенин илередип, өөрүшкү-маңнайлыг тарап чанганнар.
Мөөрейниң организакчызы болгаш эрттирикчизи М. Доржу аттыг
чаа хевирниң төп ном саңының чурт-шинчилел килдизинин
эргелекчизи Айлан Айдын-оол.
Урук ышкаш узун чажым
13 Мар.
.jpg)